Mag-utol, 1 pa tigbak sa parak

PATAY ang magkapatid at isa pang lalaki na hinihinalang tulak ng droga makaraan makipagbarilan sa mga pulis sa magkahiwalay na buy-bust operation kahapon ng madaling-araw at Lunes ng gabi sa Navotas City.

Ayon kay Senior Supt. Dante Novicio, hepe ng Navotas City  Police, nakatanggap sila ng impormasyon na patuloy ang pagbebenta ng ilegal na droga ng magkapatid na sina Jhun-Jhun, 24, at Larry Umbao, 26, kapwa ng Blk. 7, Lot 7, Site 8, Tumana Area, Brgy. North Bay Boulevard South (NBBS) sa naturang lugar.

Agad ikinasa ang buy-bust operation dakong 2:10 am ngunit lumaban ang mga suspek kaya gumanti ng putok ang mga awtoridad na nagresulta sa kanilang pagkamatay.

Nauna rito, dakong 10:30 pm, napatay sa Oplan Sita ng mga tauhan ng PCP-4 sa Lapu-Lapu Avenue at Dalag St., Tumana Avenue, Brgy. North Bay Boulevard North (NBN) nang lumaban ang suspek na si Jay-R Derder, 27, ng Blk. 32, Tumana Area makaraan sitahin dahil sa dalang sumpak.

( ROMMEL SALES )