HATAW! D'yaryo ng Bayan hatawtabloid.com
NANINIWALA si PNP chief Gen. Ronald “Bato” Dela Rosa, kung makauwi na sa bansa si Kerwin Espinosa, ang sinasabing drug lord, ay magiging malakas pa ang kanilang kaso laban sa retired general at ngayon ay Daanbantayan Mayor Vic Loot.
Ayon kay Gen. Bato, tanging si Kerwin lang ang makasasagot sa lahat ng mga tanong tungkol kay Loot.
Inamin ni Dela Rosa, sa ngayon ay nagpapatuloy ang kanilang imbestigasyon laban sa dating heneral na isa sa mga nabanggit ni Pangulong Rodrigo Duterte na naging drug coddler.
Iginiit ng PNP chief, maliban kay Loot, may iba pang narco-politicians ang patuloy na iniimbestigahan makaraan madawit ang pangalan sa watchlist ng presidente.
Nagbabala ang heneral sa mga politiko na huminto na sa ilegal na gawain dahil kung hindi ay may gagawing operasyon ang pulisya.
Magugunitang nahuli si Kerwin sa Abu Dhabi at kinasuhan ang ama niyang si Albuera Mayor Rolando Espinosa na ngayon ay nakakulong sa lalawigan ng Leyte.
