HATAW! D'yaryo ng Bayan hatawtabloid.com
DAGUPAN CITY – Patay ang tatlong miyembro ng isang pamilya makaraan mabangga ng armored car ang sinasakyan nilang tricycle sa bayan ng Sual, Pangasinan kamakalawa.
Kabilang sa namatay ang padre de pamilya na si Joel Ruiz, 31; ang dalawang menor de edad na anak na sina Dhaisy Rain Ruiz, 4, at Emegin Ruiz 3, pawang mga residente sa Brgy. Pocal-pocal, Alaminos City, habang sugatan ang inang si Fe Ruiz.
Binabagtas ng mag-anak ang kahabaan ng Brgy. Seselangan, lulan ng kanilang tricycle nang makasalpukan nila ang kasalubong na armored car na minamaneho ni Aljourney Fernandez, 28.
Dahil sa lakas ng impact, tumilapon ang mga biktima. Isinugod sila sa pagamutan ngunit idineklarang dead on arrival ang mag-aama.
