HATAW! D'yaryo ng Bayan hatawtabloid.com
DAGUPAN CITY — Hinalughog ng mga pulis ang dalawang bahay ni Ronnie Dayan, ang sinasabing dating driver-lover ni Senator Leila De Lima, sa Brgy. Galarin, Urbiztondo, Pangasinan upang ipatupad ang search warrant.
Ngunit hindi nadatnan ng mga awtoridad si Dayan at wala rin silang nakitang ano mang armas.
Tanging ang ilang kaanak at kasambahay ang nadatnan ng mga pulis.
Hinalughog din ang bahay ng ilang pulis na kinabibilangan nina PO1 Frankie Palisoc, miyembro ng PNP Urbiztondo; retired police na si Wilfredo Palisoc; Rodrigo Palisoc at William Licunan.
Nilinaw ng PNP, walang kinalaman ang kanilang hakbang sa sinasabing operasyon ng ilegal na droga sa National Bilibid Prisons (NBP) na kinasasangkutan ni Dayan kundi sa mga natatanggap nilang impormasyon na nag-iingat ang mga suspek ng matataas na kalibre ng armas.
Matatandaan, ipinaaresto ng Kamara si Dayan nang patawan ng contempt nang mabigong dumalo sa ipinatawag na pagdinig ng House Committee on Justice hinggil sa illegal drug trade issue sa Bilibid.
