Laborer patay sa torture ng 2 bayaw

GENERAL SANTOS CITY – Sumisigaw ng hustisya ang pamilya ng isang construction worker na nalagutan ng hininga sa pagamutan makaraan pasuin sa ari, pasakan ng kahoy sa bibig saka binugbog, inihulog sa tulay, dinampot saka itinapon sa imburnal ng dalawa niyang bayaw.

Kinilala ang biktimang si Gino Cuyan, 20-anyos, residente ng Tago, Brgy. Bawing, nitong lungsod.

Sa salaysay ng ama, noong Oktubre 15, binugbog ang biktima ng mga suspek na sina Aldrin Ting at Carcillo Gonsulan, kapwa bayaw ni Gino.

Pinasakan ng kahoy ang bibig, pinaso ng sigarilyo ang ari, inihulog sa tulay, dinampot at saka itinapon sa imburnal sa Park Ngilay sa nasabi pa ring barangay.

Kinabukasan, natagpuan ng ilang mga kabataan ang biktima at dinala sa pagamutan, ngunit tuluyan ding pumanaw.

Palaisipan ngayon ang dahilan kung bakit nagawa ng mga suspek ang karumal-dumal na krimen sa kanilang kaanak.

Pinaghahanap pa ang mga suspek na tumakas makaraan ang insidente.