HATAW! D'yaryo ng Bayan hatawtabloid.com
PATAY ang tatlong batang hamog habang tatlo ang sugatan kabilang ang naputulan ng dalawang hita at kaliwang kamay at sugatan sa ulo, makaraan araruhin nang rumaragasang tren ng PNR sa Sta. Cruz, Maynila nitong Sabado ng umaga.
Kinilala ang namatay na sina Andrea Regino, 13; alyas Jane, 13; at Sandy Guillen, 13-anyos.
Naputulan ng dalawang hita si Anthony de Mesa, 12; si Joshua Nepomuceno, 12, ay naputulan ng kaliwang kamay, at nagkasugat sa ulo; at si Jennyrace Eugenio, 13, ay nasugatan sa ulo at hita.
Sa imbestigasyon ni SPO1 Richard Borbon ng Manila District Traffic Enforcement Unit (MDTEU), dakong 5:15 am nang maganap ang insidente sa southbound lane sa harap ng bahay na may numero 1864 at 1865 sa Antipolo St., Sta. Cruz, Maynila.
Samantala, tumakas ang driver ng PNR train na si Joel Bolo at ang mekaniko ng tren na si Berjerio Suarez, ayon kay Security Officer Pedro Bisa Jr., imbestigador ng PNR.
Ayon sa kaibigan ng mga biktima na si John Ace Awitan, 15, nag-inoman ang mga biktima sa riles ng tren at sa kalasingan ay doon nakatulog.
Ngunit nang paparating ang tren ay hindi napansin ng driver ang mga biktima hanggang masagasaan.
Patuloy na iniimbestigahan ng pulisya ang insidente.
ni LEONARD BASILIO
