HATAW! D'yaryo ng Bayan hatawtabloid.com
MAGKAKASUNOD ang mga artistang nahuhuli dahil sa pagkasangkot sa bawal na gamot mula nang lumabas ang balitang may 50 mga personalidad sa listahan ng pulisya.
Unang nahuli sa buy bust operation ang dating bold star na si Sabrina M sa Quezon City at noong Biyernes, September 30 ay ang starlet na si Krista Miller na siya ring ‘third party’ daw sa pagkasira ng pamilya ng mag-asawang Cesar Montano at Sunshine Cruz.
Sa pinakahuling ulat, si Mark Anthony Fernandez naman ang nahuli noong Lunes ng gabi mula sa isinagawang check point sa Angeles, Pampanga.
Ayon sa balita, isang kilong marijuana ang nakuha sa kanya at habang isinusulat namin ito ay naka-detain ang aktor sa Station 6 ng Angeles City Police.
Samantala, nag-negatibo sa metamphetamine o shabu si Mark ngunit nag-positibo naman sa THC metabolites o marijuana mula sa isinagawang drug test.
Maraming mga nagmamahal sa kanya lalo na ang ‘Guwaping’ fans ang nagpasalamat hindi ito nanlaban sa pulisya.
Matatandaang noon pa nalulong sa droga ang aktor at nagboluntaryo pa nga itong pumasok sa rehabilitation center. Maraming nag-akalang pagkatapos lumabas sa rehab at naging matagumpay naman ang pagbabalik-showbiz ay makakalimutan na ang paggamit ng ipinagbabawal na gamot.
Sa kabilang banda, tuloy pa rin ang panawagan ng Presidente ng Kapisanan ng mga Artista ng Pelikula at Telebisyon (KAPPT) na si Rez Cortez na huwag agad-agad pangalanan ang mga artista na nasa listahan ng mga sangkot sa ipinagbabawal na gamot. Bagkus, paimbistagahan muna at kung kailangan ipa-drug test.
STARNEWS UPLOAD – Alex Datu
