Tsinay na syota ng convicted drug lord timbog sa P1.2-M shabu

NAARESTO ng mga operatiba ng Quezon City Police District (QCPD) ang isang babaeng Filipino-Chinese na kasintahan ng convicted drug lord, makaraan makompiskahan ng P1.2 milyon halaga ng shabu sa buy-bust operation kahapon ng madaling araw sa nasabing lungsod.

Sa ulat kay QCPD director, Sr. Supt Guillermo Lorenzo T. Eleazar, kinilala ang nadakip na si Jennifer Hong, 30, residente ng Block 8, Lot 9, Villa Lourdes Town House, Congressional Avenue, Quezon City.

Ayon kay Supt. Godofredo Tul-O, District Anti-Illegal Drugs chief, si Hong ay nadakip dakong 2:15 am sa kanto ng Agoho St., at Almasiga St., Brgy. Claro ng nabanggit na lungsod sa pangunguna ni DAID team leader, S/Insp. Ernesto Santos Jr., makaraan bentahan ng kalahating kilo ng shabu ang police asset na nagpanggap na buyer.

Idinagdag ni Eleazar, si Hong ay kasintahan ng isang convicted drug dealer na kasalukuyang nakakulong sa Quezon City Annex Jail sa Bicutan.

( ALMAR DANGUILAN )