11-anyos pisak sa killer truck

PATAY ang isang 11-anyos batang lalaki nang mabangga at magulongan ng isang trailer truck sa Malabon City kahapon ng tanghali.

Ang biktimang agad namatay sa pinangyarihan ng insidente sanhi ng pagkadurog ng ulo ay kinilalang si Joshua Sagala ng Sitio, Lupa Gozon Compound, Letre, Brgy. Tonsuya ng nasabing lungsod.

Patuloy ang follow-up operation ng mga pulis upang maaresto ang hindi pa nakikilalang driver ng JMB tracking na iniwan sa lugar ang minamanehong truck (PYW-733).

Ayon sa ulat, pasado 12:00 nn nang maganap ang insidente sa Letre Road kanto ng Gozon St., sa nasabing barangay.

Naliligo sa ulan ang biktima at papaliko ang truck sa kanto ng Gozon papasok sa kanilang garahe nang hindi napansin ng driver ang bata kaya nahagip ng kanyang minamanehong sasakyan.

Nagulungan ng truck ang kawawang biktima na naging dahilan ng kanyang kamatayan habang mabilis na tumakas ang driver ng truck makaraan ang insidente.

( ROMMEL SALES )