ABS-CBN, ‘di totoong tagilid na

HINDI naman kami naniniwala na talagang tagilid na ang ABS-CBN dahil sa naging pahayag ni President Digong Duterte sa isang interview sa kanya na inilabas sa isang blog.

Doon sa nasabing interview, sinabi ni President Digong na hindi raw naging parehas sa kanya ang ABS-CBN. May nasabi pa siyang kung gusto ka raw siraan, masisiraan ka nila. Na inayunan namang lahat ng nag-interview, ang sexy dancer na si Mocha Uson.

Marami ang nagsasabing tagilid ang network dahil matatapos na nga ang franchise nila sa 2020 at kung hindi sila mabibigyan ng franchise ng kongreso, mapipilitan silang tumigil.

Pero hindi naman kami naniniwalang mangyayari nga iyon. Hindi naman siguro benggatibo si President Digong kagaya ng mga nauna sa kanya.

Kung iisipin ninyo, hindi nga ba ginawa pa niyang secretary ng DENR si Gina Lopez Roy na alam naman nating bahagi rin ng ABS-CBN?

HATAWAN – Ed de Leon