Sen. Chiz at Heart, pagtutuunan na ang paggawa ng baby, pagkatapos ng eleksiyon

HANGA kami sa pananaw ni Vice Presidential candidate Chiz Escudero na ‘pag kumandidato ka sa politika, dapat handang manalo o matalo. ‘Yan lang daw ang pinaniniwalaan niya at hindi kasama ‘yung salitang nadaya.

Kung anuman daw ang kahinatnan ng laban niya ngayong election 2016, ngayon pa lang ay labis-labis na ang pasasalamat nilang mag-asawa (Heart Evangelista) sa lahat-lahat ng sumuporta sa kanila sa campaign period.

Samantala, kinunan din ng reaksiyon si Sen. Chiz sa tsismis na sinapak  umano siya ng asawa ni Sen. Grace Poe na si Neil Llamanzares dahil sa umamano’y hinahanap niya ang P300-M na pondo ng kampanya.

”Hindi ko rin alam kung saan galing ‘yun. Walang katotohanan whatsoever ‘yun. Magkumpare kami ni Neil. Kami na siguro ni Grace ang pinakamalapit na magka-tandem sa eleksiyong ito.

“Si Mar (Roxas) at si Leni (Robredo), ngayon lang nagkakilala. Si (Rodrigo) Duterte at si (Alan Peter) Cayetano, ngayon lang naging close. Si (Jejomar) Binay at si (Gringo) Honasan, magkaaway pa rati. Kinu-coup (d’ etat) ni Gringo si Cory (Aquino), kakampi ni Tita Cory si Binay. Si Miriam (Defensor-Santiago) at si (Bongbong) Marcos, magkaiba rin. Anti-Marcos si Miriam. Kami lang ni Senator Grace ang napakaraming pinagdaanan, napakaraming nalampasan. At ‘yung pamilya namin ang pinaka-close sa lahat ng magka-tandem,” deklara ni Senator Chiz.

Sey pa niya, ”Mabuti na rin na ‘yun ang sinasabi nila kaysa sabihin nila na magnanakaw kami o palpak o bobo kami. At least, ‘yung isyu at intriga na pinalalabas nila, maliwanag, walang basehan at katotohanan,” dagdag pa niya.

HIrit pa niya:,  ”Hindi ako naka-shades at wala akong black eye at araw-araw akong lumalabas ng bahay at nangangampanya.

“Ano ba ‘yon? Ang labo naman ng kuwentong ‘yon. Kahit sigawan, wala, ha? We’re very good actually. We get along perfectly well,” bulalas pa ni Senator Chiz.

“Bahagi ‘yan ng eleksyon. Parang showbiz lang ‘yan, kapag may pelikula, ang daming isyung lumalabas. Sa politiko ho, ‘pag may eleksiyon, maraming rin isyung lumalabas,” aniya pa.

“Sa politika ho, may posibilidad na walang kabase-basehan,” sambit pa ng simpatikong Senador.

Si Sen. Chiz ang tipo ng Vice Presidential candidate na hindi palaaway pero palaban siya ‘pag nasa katwiran. After election kasi ay makakasalubong niya ang mga ito at ayaw niya ‘yung iiwas siya ‘pag nagkita sa restoran o ibang events.

Anyway, kahit anong resulta sa eleksiyon, matalo o manalo ay naka-set na silang gumawa ng baby ni Heart sa susunod na taon.

Pak!

TALBOG – Roldan Castro