Killer ng misis ni Papa Dom arestado

BUMAGSAK sa kamay ng mga operatiba ng Makati City Police ang taxi driver na sinasabing sangkot sa pagholdap at pagpaslang sa isang ginang na asawa ng isang musikero at ilang serye ng pagholdap at paghalay sa isa sa mga pasahero, kamakalawa sa Bulacan.

Sa ulat na isinumite ni Makati City Police chief, Sr. Supt. Ernesto Barlam, kay Southern Police District (SPD) Chief Supt. Eusebio Mejos, ang naarestong suspek ay kinilalang si Ricky Ibatuan-Ramos, 24, tubong Brgy. Santo Niño, Gapan City, Nueva Ecija, residente ng Brgy. Harapin Ang Bukas, Mandaluyong City.

Sinabi ng tagapagsalita ng Makati Police na si Sr. Insp. Roman Salazar, nasakote si Ramos dakong 4 p.m. sa Brgy. Santa Lucia, San Miguel, Bulacan, sa pamumuno ni Supt. Angelo Germinal, deputy chief of police ng Makati City, kaugnay sa mga kasong robbery.

Ang pagdakip kay Ramos sa bisa ng mga warrant of arrest na inisyu nina Judge Alma Crispina Collado-Lacorte, ng Branch 21, Manila Regional Trial Court (RTC) at Judge Ronald B. Moreno, ng Branch 147, Makati City RTC.

Sa record ng pulisya, sangkot si Ramos sa pagholdap at pagpaslang kay Maria Amparo Gamboa, biyuda ng Filipino Musician na si Dominic “Papa Dom” Gamboa noong Pebrero 10, 2016 sa Kalayaan Avenue, Brgy. Guadalupe Nuevo, Makati City.

Sinasabing sangkot din si Ramos sa ilang serye ng pagholdap sa Makati at Mandaluyong at hinalay ang isa sa mga naging biktimang pasahero.

Ang modus ni Ramos ay pagkarnap ng taxi sa area ng Quezon City at Pasay, pagkatapos ay magpapanggap na driver at saka mag-aabang ng pasahero na kanyang bibiktimahin.

Masusi na rin iniimbestigahan ng Makati Police, kung sangkot din si Ramos sa pagholdap at pagbaril sa isang 17-anyos freelance therapist, sa Mandaluyong, noong Marso 21 dakong 3:30 a.m. sa Malugay St., Brgy. Bel Air, Makati City.