Susan, nadapa nang samahan si Grace sa Comelec

NADAPA pala sa Padre Faura ang Movie Queen na si Susan Roces noong suportahan niya ang kanyang anak na si Senator Grace Poe sa first part ng oral arguments sa Supreme Court para sa mga petisyon na inihain ni Sen. Grace Poe na mabasura ang mga decision ng Commission on Elections (COMELEC) na pumipigil na siya ay tumakbo bilang Pangulo ng Pilipinas.

Humingi ng paumanhin si Grace  sa press dahil hindi nasagot ni Susan ang mga katanungan dahil may iniinda itong sakit.

“Pagpasensyahan na kami. Alam n’yo ang nanay ko, hindi na rin ganoon kabata. Naglakad din siya mula Padre Faura papunta roon sa ‘yung mga nakakita sa kanya. ‘Di ba, nadapa siya? Hindi na lang niya ipinakita ‘yung kanyang pagdaing pero ‘yung paa niya medyo namaga roon,” paliwanag ni Grace.

Anyway, 11 taon matapos pumanaw ang Hari ng Pelikulang Filipino, mabango pa rin ang pangalan ni Fernando Poe Jr.dahil sa rami ng kaniyang natulungan sa industriya ng showbiz at maging sa mga pangkaraniwang mamamayan.

Kaya naman pangako ni Sen. Poe, hinding-hindi siya gagawa ng bagay na ikasisira ng pangalan ng kanyang mga magulang na sina FPJ at respetadong aktres na si Susan kung siya ay papalaring maging pangulo ng bansa.

TALBOG – Roldan Castro