Angel, gustong magka-anak kaya ‘di muna magda-Darna

“GUSTO kong magka-anak,” ito ang bungad na pahayag ni Angel Locsin nang tanungin namin kung siya pa rin ang gaganap na Darna.

Sa kanyang tinuran, puwedeng isipin na naghahanda na itong maging Mrs. Luis Manzano. Ang posibleng problema lang ay kailangan muna niyang magpagaling.

Sa ngayon, kailangan niyang kompletuhin ang pagpapagamot at pahinga kung gustong magkaanak dahil mahirap sa kanya ang magdalang-tao dahil sa kondisyon ng spinal column.

“’Yung na po talaga tungkol sa aking disc. Tingnan na lang natin pero talagang health ang gusto ko kasi gusto kong magka-baby. Kaya ngayon, mahirap sabihin na ako uli si Darna kasi kailangan kong gumaling muna,” paglilinaw nito.

Inamin nitong babalik pa siya sa hospital para sa check-up pagkatapos ipalabas ang kanilang Everything About Her movie. ”So far tapos na ‘yung procedure ko sa pagpapagamot pero after the movie, premiere night and block screenings, mag-a-undergo pa rin ako ng column theraphy. Kailangan ko siyang ipagpatuloy. So far, okey naman po siya.” ( Alex Datu )