Gelli Kapamilya na, talk show na pagsasamahan nila nina Janice at Carmina niluluto na

Magiging Kapamilya na si Gelli De Belen. Nagtapos ang kontrata niya sa TV5 noong Oktubre, freelancer daw siya ngayon. Hindi na rin daw nagpapapirma ng network contract ang TV5.

“I still have a show with TV5 right now, it’s ‘Happy Truck Ng Bayan’, na ine-air siya every Sunday, with Ogie (Alcasid), Janno (Gibbs) and Derek (Ramsay),” sey niya.

Ayaw niya talagang kompirmahin kung saang estasyon siya.

“Mahirap  magsalita hangga’t hindi official, hangga’t hindi nakakasa, mahirap magsalita, ‘di ba?

“So… malalaman n’yo naman ‘yun eh, ‘pag sigurado na. ‘Ika nga sa AlDub,  sa tamang panahon,”  deklara niya sabay tawa.

Ayaw ding aminin ni Gelli na may nilulutong talk show para sa kanilang tatlo nina Janice de Belen at Carmina Villaroel ang ABS-CBN. Wala naman daw offer na ganyan.

Pero excited din  siya para sa next level ng career niya. Pero hindi naman niya itinatanggi na  malaki  rin ang utang na loob niya sa TV5. Tinambakan siya ng shows na hindi niya magagawa sa iba.

Pak!

( ROLDAN CASTRO )