PNoy deadma sa pagtakbo ni Duterte

TIKOM ang bibig ni Pangulong Benigno Aquino III sa inaasahang pagsabak ni Davao City Mayor Rodrigo Duterte sa 2016 presidential elections.

Sinabi ng Pangulo, wala siyang hawak na ano mang dokumento hinggil sa kandidatura ni Duterte sa 2016 presidential race kaya gaya ng iba, ang kanyang opinyon ay espekulasyon lang.

Aniya, hindi naman siya ang magpapasya nang paglahok ni Duterte sa halalan.

“Wala akong tangan na ano. Alam n’yo parang one hindi ko tangan literally iyong dokumento; number two, hindi rin ako ang magdedesisyon e kaya ang opinyon ko pare-pareho lang ng opinyon natin. Ngayon, kapag lumabas lahat ng facts, siguro mas maliwanag,” aniya sa media interview sa Kuala Lumpur, Malaysia makaraan ang ASEAN summit kamakalawa.

Hinggil sa kandidatura ni Sen. Grace Poe, naniniwala si Pangulong Aquino na ang taongbayan na ang dapat magpasya kung karapat-dapat siyang ihalal bilang susunod na presidente ng bansa.

Ngunit wala rin siyang komentaryo sa pagbasura ng Senate Electoral Tribunal (SET) sa disqualification case laban kay Poe.

Kaugnay nito, nanawagan si Presidential Spokesman Edwin Lacierda na dapat plataporma ang gawing basehan sa pagpili ng kandidato at hindi popularidad lang.

Ang pambato aniya ng administration na si Liberal Party standard bearer Mar Roxas ay may malinaw na gagawin kapag inihalal at ito’y ang pagpapatuloy ng ‘daang matuwid’ ng administrasyong Aquino.