Media sinisi ni PNoy sa nabulgar na tanim-bala

ISINISI ni Pangulong Benigno Aquino III ang media sa pagkabuyangyang ng tanim-bala scam sa Ninoy Aquino International Airport (NAIA) na umani ng batikos sa iba’t ibang parte ng mundo.

Sinabi ni Pangulong Aquino, hindi naman ganoon talaga kalala ang insidente ng tanim-bala, pinalaki lang ng media at may nakinabang sa paglaki ng isyu.

“Hindi naman yata ganoon ang nangyari. Medyo na-sensationalize at medyo may mga nakinabang nang mag-sensationalize niyan,” aniya sa media interview sa Kuala Lumpur, Malaysia makaraan ang ASEAN summit kamakalawa.

Minaliit niya ang tanim-bala isyu dahil batay sa estadistika na isinumite sa kanya ng Department of Transportation and Communications (DoTC) , lumalabas na sa 34 milyong pasahero na gumamit ng NAIA sa loob ng isang taon ay 1,200 ang insidente nang nahulihan ng bala at dalawang katao lang ang nagreklamo na sila’y kinikilan ng mga awtoridad.

Wala pa aniyang report na ibinibigay sa kanya ang National Bureau of Investigation (NBI) hinggil sa tanim-bala scam.

Hindi aniya dapat daanin sa haka-haka ang usapin, kailangang hanapan ng pruweba at kapag napatunayan na may nagkasala ay parusahan.

Walang binanggit ang Pangulo kung pakikinggan ang panawagan ng kanyang mga “boss” na sibakin sa puwesto si Manila International Airport Authority (MIAA) general manager Angel Honrado na sinasabing kanyang pinsan, dahil sa doktrina ng command responsibility.