Raliyista nakalapit sa APEC venue (Binomba ng water cannon)

PINAIGTING ng Asia-Pacific Economic Coop-eration (APEC) security ang kanilang pagbabantay sa paligid ng Philippine International Convention Center (PICC) at International Media Center (IMC) nang makalapit ang ilang raliyista sa event venue kahapon.

Ayon sa source, naghiwa-hiwalay ang mga nagpoprotesta kaya nakapuslit ang ilan sa kanila sa mga barikada ng mga awtoridad.

Dahil dito, inihanda ng mga tauhan ng Bureau of Fire Protection (BFP) ang kanilang water cannon sakaling kailanganin para paalisin ang mga raliyista.

Bago mag-alas tres kahapon, ginamit rin ng mga bomberong nagmula pa sa south Luzon, ang water cannon para tuluyang buwagin ang hanay ng mga demonstrador.

Ang nasabing mga bombero ay pinaniniwalaang siya ring bumuwag sa piketlayn ng mga manggagawa sa Asia Brewery sa Laguna.

Ngunit ayon sa APEC security, pakikiusapan muna nila ang mga protesters na lisanin ang ‘no rally zone,’ ngunit kung magmamatigas ay saka lang sila gagawa ng iba pang aksyon.

Nananatili ang maximum tolerance ng mga awtoridad sa mga raliyista.

Samantala, binomba ng tubig ng mga bombero ang nagpupumilit na militanteng grupo na pasukin ang barikada ng mga awtoridad sa kahabaan ng Buendia Ave. at Roxas Blvd. malapit sa (PICC) sa Pasay City kahapon ng umaga.         

Bandang 10 a.m. 500 raliyista ang sumugod sa lugar at nakipagtulakan sa mga pulis.

Dahil sa pagpupumilit na makadaan at makapasok sa kahabaan ng Roxas Boulevard, binomba sila ng tubig ng mga bombero.