Killer ng bebot nalambat

BUMAGSAK na sa kamay ng mga tauhan ng Muntinlupa City Police ang dalawang suspek na sinasabing pumatay sa 38-anyos  babae sa harap ng New Bilibid Prison (NBP) nitong Biyernes (Oktubre 9) sa lungsod.

Kinilala ni Muntinlupa City Police chief, Senior Supt. Alan Nobleza ang mga nadakip na sina Eugene Ebisa, 30, at Reynaldo Cunanan, Jr., 36, sasampahan ng kasong murder sa Muntinlupa Prosecutor’s Office kaugnay nang pagpaslang sa biktimang si Leonora Deyta, 38-anyos.

Kamakalawa nasakote ng mga awtoridad ang dalawang suspek na magkaangkas sa isang Suzuki motorcycle (NC 88118) sa San Guillermo St. hangganan ng Brgy. Alabang at Brgy. Bayanan.

Nakuha sa pag-iingat ng mga suspek ang isang kalibre .45 baril na walang lisensiya, sinasabing ginamit sa pagbaril sa babaeng biktima, gayondin ang motorsiklong pinaniniwalaang ginamit nila sa pagtakas.

Base sa record ng Muntinlupa Police, Biyernes dakong 3:30 p.m., dumalaw sa isang preso sa NBP ang biktima at habang naglalakad papauwi ay biglang binaril ni Ebisa sa leeg si Deyta. Pagkaraan ay sumakay ang suspek sa naghihintay na motorsiklong minamaneho ni Cunanan. Isinugod ng Muntinlupa rescue team sa Muntinlupa Medical Center ang biktima ngunit binawian ng buhay habang nilalapatan ng lunas dakong 4:30 p.m. ng nasabing petsa.