Producers ng Showtime pupulungin ng MTRCB (Sa pagbubugaw kay Pastillas)

ITINAKDA ng Movie and Television Review and Classification Board (MTRCB) sa Oktubre 13 ang dayalogo sa mga producer ng isang noontime show dahil sa isyu ng pambubugaw.

Ayon kay MTRCB Chair Atty. Eugenio Villareal, ito ay bilang tugon sa inihaing reklamo ng women’s group na Gabriela, na tila ibinubugaw na ang binansagang “Pastillas Girl” alang-alang sa ratings.

Kabilang sa mga pupulungin ng Gender And Development (GAD) committee ng MTRCB ang “It’s Showtime” director na si Norbert Vidanes, Business Unit Head Reilyl Santiago, at Executive Producer Mark Rejano.

Una rito, nais ng Gabriela na imbestigahan ng MTRCB ang nasabing segment na layong makatagpo ang babaeng nagngangalang Angelica Yap ng bagong lover makaraang lokohin ng kanyang dating boyfriend.

Hindi anila tama na mistulang ibinubugaw na sa mga lalaki si “Pastillas Girl” para lamang matapatan ang love team nina Alden Richards at Maine Mendoza na ‘Aldub’ sa Eat Bulaga ng GMA.