Electrician kritikal sa gumuhong scaffolding

KRITIKAL ang kalagayan sa pagamutan ng isang electrician makaraang gumuho ang kinatatayuang scaffolding sa itinatayong hotel malapit sa isang malaking shopping mall sa lungsod ng Pasay kahapon.

Inoobserbahan sa San Juan De Dios Hospital ang biktimang si Jennis Gantalao, 20, ng Goldentec Contructor Corporation, stay-in sa construction site ng Conrad Hotel sa MOA Complex, Pasay City.

Ayon sa pahayag ni Alfredo Malasan (half-brother ng biktima) sa pulisya, dakong 7:40 a.m. nang mangyari ang insidente sa ika-15 palapag ng nasabing hotel.

Aniya nakatayo ang scaffolding ng biktima nang bigla itong gumuho at bumagsak kasama ni Gantalao.

Napag-alaman, ilang construction worker na ang nadidisgrasya sa ginagawang hotel ngunit hindi ipinaaalam sa mga awtoridad.

Ayon sa pulisya, posibleng kasuhan ang kontraktor ng hotel kapag napatuyang hindi sumunod sa safety measure. 

Patuloy na iniimbestigahan ng pulisya ang naturang insidente.