‘Lovers’ itinali binoga sa SUV (Sa Mexico, Pampanga)

HINIHINALANG love triangle ang motibo ng pagpatay sa natagpuang bangkay ng babae at lalaki sa loob ng nakaparadang SUV sa parking lot ng SM mall sa Mexico City, Pampanga, kamakalawa.

Sa ulat na ipinadala sa tanggapan ni PRO3 director, Chief Supt. Rudy Lacadin, kinilala ang mga biktimang sina Aly Santos, 50, ng Concepcion, at Liezel Corpuz, 32, ng Sta. Catalina, kapwa ng Lubao, parehong may mga tama ng bala sa ulo.

Ayon sa roving guards ng SM mall, dakong 7 a.m. nang mapuna nila ang black Hyundai (MOB-19) na magdamag na nakaparada sa parking lot.

Nang kanilang silipin, nakitang may dalawang tao na walang malay sa loob. Bunsod nito, agad nilang ipinagbigay-alam sa mga awtoridad ang insidente.

Sa pagresponde ng mga pulis, nabatid na ang mga biktimang kapwa nasa likurang upuan ay nakatali ang mga kamay at may mga tama ng bala.

Napag-alaman, si Santos ay balikbayan, may pamilya sa Chicago, USA at ilang araw na lamang ay pabalik na sa nasabing bansa.

Habang si Corpuz ay hiwalay sa unang asawa, may isang anak na babae, at kasalukuyang may live-in partner.