2 tiklo, 1 tinutugis sa ninakaw na kotse

ARESTADO ang dalawang lalaki habang tinutugis ang isa pa makaraang tangayin ang sasakyan ng isang mag-ina nang mag-check-in sa isang hotel sa Pasay City.

Patuloy na hinahanap ng mga kagawad ng Pasay City Police ang pangunahing suspek na si Raymund Benedict Anthony Alviar, 29, binata, gym instructor ng 6 Puzon St., San Gabriel Village,Tuguegarao City.

Habang nakapiit na ang kanyang mga pinsan na sina Chris Albert Garcia, 27, ng Hilario St., Brgy. Palanan, Makati City at Arvin Calgo, 29, may-ari ng shop na Ilocos Native Product ng Alcala, Cagayan.

Kahapon ay nagsampa ng reklamo sa himpilan ng pulisya ang biktimang si Sandra Stinnett, 45, ng Purok 7, Brgy. Carig-Sur, Tuguegarao City, Cagayan.

Ayon sa nakarating na ulat sa tanggapan ni Pasay City Police chief, Senior Supt. Joel Doria, dakong 2 a.m. nitong Biyernes, Setyembre 25, nag-check in si Stinnett kasama ang anak niyang si Natalia Ann Hussein, at sa hiwalay na silid ang tatlong suspek sa Asiatel Hotel sa Andrew Avenue.

Sinasabing magkaibigan sina Stinnett at Alviar at kasamang nakatira sa bahay ng ginang.

Inutusan ni Stinnett si Alviar na iparada ang isang itim na Chevrolet Trail Blazer (AAO-9245) na pag-aari ng ginang, sa parking space ng hotel.

Napansin ng mag-ina bandang 6 a.m. ng Setyembre 26 na wala ang kotse gayondin si Alviar. Sa pag-aakalang may binili lamang sa labas ng hotel, ipinasya ng ginang na hintayin hanggang 12 p.m. ng linggo (Setyembre 27) ngunit hindi na nagpakita ang suspek.

Bunsod nito, nagtungo ang mag-ina sa tanggapan ng Police Community Precinct (PCP-8) at inireklamo ang pagkawala ng sasakyan at ni Alviar.

Sa follow up operation ng mga pulis, pinuntahan nila ang inupahang silid sa hotel ng magpipinsan upang imbitahin sa presinto ngunit nakompiskahan ng droga sina Garcia at Calgo nang sila ay datnan ng mga pulis doon.