Military hit list itinanggi ng PH army (Laban sa supporter ng Lumad)

 MARIING itinanggi ng pamunuan ng Philippine Army (PA) na may umiiral na military hit list laban sa human rights advocates na tumutulong sa Lumad communities sa Davao del Norte at Bukidnon.

Ayon kay Philippine Army (PA) spokesperson, Col. Benjamin Hao, ang alegasyon na mayroong hit list ang militar ay bunga lamang ng imahinasyon ng mga nag-aakusa laban sa kanila.

“The hit list allegation is a figment of the accusers’ imagination,” wika ni Hao.

Paglilinaw ng opisyal, walang katotohanan ang nasabing hit list at alam ng sambayanan na ang New Peoples Army (NPA) ang siyang gumagawa ng hit list.

Giit ni Hao, ang AFP ay protektor ng mga Filipino laban sa mga kalaban ng gobyerno

“The AFP is the protector of the Filipino people, whatever his or her social, political or economic leaning is,” pahayag ng Army spokesperson.

Una rito, nagpasaklolo ang ilang mambabatas at ilang human rights advocates sa Supreme Court at humiling ng Writ of Amparo makaraang mabatid na nasa hit list ng militar ang kanilang mga pangalan.