KKK ni PNoy papalit kay Mar sa DILG

ISA na namang mula sa KKK (kaibigan, kaklase at kabarilan) ni Pangulong Benigno Aquino III ang nakasungkit ng cabinet position sa kanyang administrasyon.

Inihayag kahapon ni Pangulong Aquino na si Western Samar Rep. Mel Senen Sarmiento ang papalit kay Mar Roxas bilang Interior Secretary.

Si Sarmiento ang secretary general ng Liberal party (LP), malapit na kaibigan ni Pangulong Aquino, at nasa huling termino ng pagiging kongresista.

“Yes, si Mel Sarmiento. I offered the post to him… This is subject to the confirmation of the CA (Commission on Appointments),” ayon sa Pangulo sa Phil. Daily Inquirer forum kahapon.

Nagbitiw si Roxas nitong Agosto 3 para paghandaan ang kanyang pagsabak sa 2016 presidential elections bilang standard bearer ng Liberal Party (LP).

Si Sarmiento, gayondin sina Executive Secretary Paquito Ochona, Budget Secretary Butch Abad, BIR Commissioner Kim Henares, Cabinet Secretary Rene Almendras, DSWD Secretary Dinky Soliman, Finance Secretary Cesar Purisima ay ilan sa sinasabing taga-KKK.