Kelot nilagare sa leeg ng ama

KALIBO, Aklan – Sugatan ang isang 23-anyos lalaki makaraang gilitan sa leeg ng kanyang sariling ama gamit ang lagare sa Brgy. Bakhaw Sur, Kalibo, Aklan kamakalawa.

Ang biktimang agad isinugod sa Aklan Provincial Hospital ay kinilalang si John Marvin Esperidion, residente ng Brgy. Cogon, Malinao, habang ang suspek ay si Tranquilino Esperidion, 52-anyos, ng nasabi ring lugar.

Sa inisyal na imbestigasyon ng Kalibo PNP Station, habang nag-iinoman ang mag-ama nang ibalita ng anak ang pakikipag-relasyon ng isa niyang kapatid na babae sa isang lesbian.

Sa puntong ito ay nagalit ang suspek at nagkaroon sila ng mainitang pagtatalo ng biktima.

Pagkaraan ay biglang kumuha ng maliit na lagare ang suspek, hinawakan ang ulo ng anak at ginilitan sa leeg.

Ngunit mabilis na nakapiglas at nakahingi ng saklolo ang biktima sa kinakasama ng kanyang ama.

Hindi na naabutan ng nagrespondeng mga pulis ang suspek na agad tumakas.

Hindi pa matukoy kung itutuloy ng anak ang pagsasampa ng reklamong attempted parricide laban sa kanyang ama.