Kelot patay, 4 sugatan sa kotse vs trike

PATAY ang isang lalaki habang apat ang sugatan makaraang salpukin ng isang kotse ang sinasak-yan nilang tricycle sa Don Mariano Marcos Avenue, Quezon City kamakalawa ng gabi. 

Sa ulat ni Insp. Marlon Meman, hepe ng Quezon City Police Traffic Sector 2, kinilala ang biktimang si Michael Capatian, 39, driver ng tricycle, at residente ng 56 Sora St., Brgy. Paltok ng nabanggit na lungsod.

Habang ang mga sugatan ay sina Adelita Capatian, 63; Mary Ann Rabino, 30; Bladimir Rabino, 13; at Tj Sam Capatian, 9-anyos.

Si Michael ay namatay habang nilalapatan ng paunang lunas sa ospital.

Agad sumuko sa pulisya ang driver ng Mitsubishi Lancer (BCJ-112) na si Josemelito Paguirigan, 27, ng 18 Brera St., Casa Milan Subdivision, Fairview, Quezon City, makaraan ang insidente.

Sa imbestigasyon ni SPO1 Rabindranath Sierra, dakong 10 p.m., tinatahak ng dalawang sasakyan ang nasabing lugar galing sa Commonwealth Avenue patungong Mindanao Avenue Extension ngunit pagsapit sa nabanggit na lugar ay binundol ng kotse ang tricycle.

Sa lakas ng pagkakabundol, tumalsik nang ilang metro ang tricycle sanhi upang dumanas nang matinding pinsala sa katawan si Michael.

Kasong reckless imprudence resulting in damage to property with homicide, at multiple physical injury ang kinakaharap na kaso ni Paguirigan.