HATAW! D'yaryo ng Bayan hatawtabloid.com
ITINATAK sa isip nina Josie Gabuco at Nesthy Petecio ang kanilang galing sa kani-kanilang kalabang taga-Uzbekistan para umabante sa ASBC Asian Women’s Boxing Championships sa Wulanchabu Sports Gymnasium sa Wulanchanbu, China nang nakaraang linggo.
Kinailangan lamang ni Gabuco, ang 2012 AIBA world champion, ng tatlong round para idispatsa si Atakulova Gulasal sa kabila ng tangka ng Uzbek na bumawi sa laban ngunit sadyang dinomina ng Pinay ang karibal nang sunod-sunod na left hook.
Sa ikalawang yugto ng sagupaan, naipagpatuloy ng tubong-Palawan, na nagwagi ng apat na gintong medalya sa Southeast Asian Games (SEAG) nitong Hunyo sa Singapore, ang kanyang pag-atake sa salitang hook at straight sa ulo ni Gulasal para bigyan ng standing eight-count tungo sa pagwawakas ng round.
Labis pa ang nasaksihan ng mga hurado sa ikatlong round sa sunod-sunod pang right straight at left hook ni Gabuco na nagbunsod sa referee na bigyan ng dalawa pang standing eight-count ang Uzbek para iselyo ang panalo ng PLDT-ABAP boxer na TKO victory.
Sa kabilang dako, napaharap naman si Petecio sa mas agresibong katapat na si Aziza Yakubova, na sa buong laban ay panay ang sugod sa Pinay sa tangkang siya ang magdikta ng takbo ng kanilang laban.
Ngunit kinontra ng pambato ng Davao del Sur ang pagpupursigi ni Yakubova ng matitinding right hook na yumanig sa Uzbek, para tumanggap ng dalawang standing eight-count sa opening round pa lang.
Kinailangan lang ni Petecio ng 30 segundo sa ikalawang round para umani ng TKO win para sa koponan ng Filipinas.
Sa unang araw ng kompetisyon, nagwagi si Irish Magno kontra kay AIBA World Youth champion Lin Yu Ting ng Chinese-Taipei sa labang tumagal nang apat na round.
Kinalap ni Tracy Cabrera
