Sekyu utas, 1 sugatan sa carjacking sa Kyusi

AGAD binawian ng buhay ang isang guwardiya ng e-games at sugatan ang isang lalaki sa insidente ng carjacking sa Quezon City, nitong Miyerkoles ng madaling araw.

Ayon sa mga testigo, palabas ng e-games ang lalaking kinilala bilang si Enrico Lim nang salubungin siya ng dalawang armadong lalaki.

Hinablot ng mga suspek ang clutch bag ni Lim ngunit tumanggi ang biktimang ibigay ito. Sinita ng guwardiyang si Aludio Paloran ang mga lalaki na nag-udyok sa kanilang barilin ang biktima.

Patay si Paloran habang may tama ng bala sa likod si Lim na agad isinugod sa ospital.

Natangay ng mga suspek ang puting Land Cruiser ni Lim. Hindi pa malinaw kung natangay rin ang bag ng biktima.

Pitong basyo ng M16 rifle at 9mm ang narekober sa crime scene.