Pagkain ng itlog, nakapagpapahaba ng buhay sa GRR

SINO ba ng makalilimot sa singer na todo kung bumirit at nagpasikat ng kantang Tukso na si Eva Eugenio? Tuwing mapakikinggan ang awit ay tiyak na mapapa-Eva Pa More kayo.

Ang nabanggit na awiti’y naghatid kay Eva sa tagumpay dahil noong panahong isinaplaka niya ito’y itinanghal na blockbuster at sumira ng record ng ibang plakang kasabay na-release. Mahigit tatlong dekada na ‘yon at sa pakikipanayam kay Ms. Tukso ni Mader Ricky Reyes sa programa ng GMA News TV na Gandang Ricky Reyes Todo Na ‘Toh (GRR TNT) ay ibibida niya ang mga pinagdaanang masasaya at malulungkot na karanasan sa buhay.

Kundi ninyo alam, inirerekomenda ng mga holistic doctor ang pagkain ng itlog sa mga may sakit na cancer, diabetes o alta presyon.  Pinabulaanan nila na ang itlog ay may cholesterol. Ang pagkain ng tatlo hanggang walong itlog (hindi man nakapagpapagaling) ay nagpapahaba ng buhay ng kanilang pasyente.

Samahan si Mader sa pagdalaw niya sa isang kainang naghahain ng ordinaryong itlog na ginawang kakaiba at mas ginawang EGG-citing dahil kakaiba ang luto at preparasyon.

Sisilipin din ng GRR TNT ang talyer ng carmaker/restorer na si Vince Mercado. Sa simula’y hobby lang ang pagbubuo at pagre-repair ng kotse. Lumao’y dumami ang mga nagpapagawa sa kanya at naging matagumpay na ang kanyang auto shop.

Laging ipinapayo sa mga buntis at bagong panganak ang paghigop ng sabaw na may lahok na malunggay. Sa pag-aaral ng sikat na kimiko sa isang laboratoryo sa Pilipinas ay natuklasang mabisa rin ang madahong gulay bilang sangkap ng hair shampoo at conditioner. Ang mga ito’y mabibili sa lahat ng Gandang Ricky Reyes Salon sa buong bansa.

Ang GRR TNT ay prodyus ng ScriptoVision at napapanood tuwing Sabado, 9:00 a.m. sa GMA News TV.