Ang ‘Living Goddess’ ng Nepal

NANG tamaan ng malakas na lindol ang Nepal noong buwan ng Abril, napuwersa ang longest-serving ‘living goddess’ ng nasabing bansa na gawin ang ‘bawal’—maglakad sa kalsada sa kauna-unahang pagkakataon sa buong buhay niya, wika ng ‘diyosa’ sa panayam ng AFP.

Sinusunod pa rin ang cloistered lifestyle na kanyang pinasukan noong edad 2-anyos pa lang, nagbukas ng saloobin si Dhana Kumari Bajracharya ukol sa mahabang pamumuno niya sa nakalipas na 30 taon, na bumanggit sa pasakit ng kanyang pagkakaalis sa trono noong 1980s.

Bago ang 7.8 magnitude na lindol noong nakaraang Abril 25, nagpakita lang sa publiko si Bajracharya habang sakay ng kanyang palanquin na inukit mula sa kahoy.

Naninirahan ang tinaguriang ‘living goddesses’ ng Nepal, na mas kilala bilang mga Kumari, nang tago sa mata ng mga tao at pambihirang nagsasalita sa harap ng publiko, nakatali sa kaugalian na pinagsanib ang mga element ng Hinduismo at Budismo.

Ngunit nang umarangkada ang malakas na pagyanig, na naging dahilan ng pagguho ng mga gusali at pagkamatay ng libo-libong tao, nilisan ni Bajracharya ang kanyang tirahan sa makasaysayang lungsod ng Patan, sa katimugan ng Kathmandu, sa unang pagkaka-taon sa loob ng tatlong dekada. At sa kauna-unahang pagkakataon din lumakad na hindi nakasakay sa kanyang palanquin.

“Marahil ay galit ang mga diyos dahil hindi na inirerespeto ng mga tao ang mga tradis-yon,” wika ng 63-anyos na kumari.

Habang winawasak ng kalikasan ang Nepal, na yumanig din sa tahanan ni Bajracharya, nanatili ang kanyang pamilya sa loob ng kanilang bahay, hinihintay kung ang retiradong Kumari ay lilihis sa tradisyon at maglalakad palabas kasabay sila.

“Hindi namin basta magawang lisanin ang bahay tulad ng iba, kinailangan naming isipin siya. Hindi namin malaman kung ano ang gagawin,” wika ng pamangkin ng kumari na si Chanira Bajracharya.

“Pero kapag pinuwersa ka ng kalikasan, nagagawa mo ang bawal,” dagdag ng dalaga.

Kinoronahan bilang kumari noong 1954, pinaniniwalaang siya ang kumakatawan sa Diyosa ng mga Hindu na si Taleju.

Kinalap ni Tracy Cabrera