Sunshine, kontento na basta’t kasama ang mga anak

HATAWAN – Ed de Leon . 

MARAMI ang naghihinayang na wala si Sunshine Cruz doon sa press conference niyong Just The Way You Are. May special role ang aktres sa nasabing pelikula. Marami pa naman ang nag-aabang kay Sunshine dahil sa ilang controversial na issues na gusto nila siyang mag-comment, pero siguro naisip nga nila huwag na lang. Kung dumating doon si Sunshine, baka napag-usapan ang kung ano pa at nakalimutan ang pelikula. Siyempre mangingibabaw ang issues.

Pero si Sunshine naman, halos ayaw nang gumawa ng kahit na anong public statement sa mga issue na sinasabi. Ang katuwiran ni Sunshine, hintayin na lang kung ano ang mangyayari. Basta kasi siya, ang gusto lang niya ay makakawala na rin sa mga isyu na iyan at makawala na rin sa kung ano mang mga dating responsibilidad mayroon siya.

Gusto niyang mapalaki na lang ng maayos ang kanyang tatlong anak. Kung ano man ang mangyari, kung may makuha mang suporta ang mga iyon mula sa kanilang ama o wala, pareho lang kay Sunshine, after all maganda naman ang itinatakbo ng kanyang career at nakakaya naman niyang suportahan kung ano man ang pangangailangan ng kanyang mga anak.

Inaamin ni Sunshine, na medyo bawas nga lang ngayon ang mga luho nila, pero natutuwa siya at ok lang naman iyon sa kanyang mga anak. Sinasabi naman niyong mga bata na happy na sila basta magkakasama sila at tahimik na ang kanilang buhay. Kung iisipin mo nga naman, wala naman talagang substitute sa tahimik na buhay.