Remake ng Ang Probinsyano, idea ni Coco!

SI Coco Martin pala ang nakaisip na magandang gawing teleserye Ang Probinsyano ni Fernando Poe, Jr. dahil naghahanap daw si ABS-CBN President and CEO, Charo Santos-Concio ng istorya tungkol sa mga buhay ng pulis o mga sundalo bilang pagpapahalaga sa SAF 44.

Pagtatapat ni Coco sa ginanap na media announcement noong Lunes ng hapon, “honestly, ako po ‘yung nagbigay ng idea sa kanila kasi gusto po ni Ma’am Charo na gumawa ng isang police na istorya, rito nga po sa teleserye namin.

“And then noong sinabi nina Sir Deo na ‘yun ang gusto ni Ma’am Charo and then sinabi ko po, ‘Alam niyo po, may magandang pelikula si FPJ, ‘Ang Probinsyano’. So ‘yun, after that pinag-usapan nila.”

At dahil si Coco ang nakaisip ng idea at maganda rin ang ratings ng MMK niya na ginampanan niya ang isang SAF member ay ibinigay na ni Ms. Charo ang project sa aktor.

Si Ms. Charo ang mismong pumili kay Coco para gumanap sa papel na Ang Probinsyano na pamamahalaan naman ng Dreamscape Entertainment sa pangunguna nina Deo T. Endrinal, Julie Ann Benitez, Rondell Lindayag, at Kylie Manalo-Balagtas.

Labis ang tuwa ng aktor nang banggitin sa kanya na siya ang gaganap at talagang abot-abot ang pasalamat niya sa lahat.

BUONG LIBRARY NG MGA PELIKULA NI FPJ, IPINAGKATIWALA SA ABS-CBN

Ang buong library ng mga pelikula ni FPJ ay ipinagkatiwala ng actor sa ABS-CBN at bago nga siya binawian ng buhay ay nagkaroon sila ng verbal agreement ni Ms. Charo at naging pormal ito noong isalin nila sa papel.

Labis ding nagpasalamat ang Da Wife ni Da King na si Ms. Susan Roces sa ABS-CBN sa pagbibigay ng halaga sa mga project ni FPJ.

Naikuwento ni Coco na noong ginagawa nila nina Ms. Susan ang seryeng Walang Hanggan noong 2012 ay nabanggit na raw ng Reyna ng Pelikula na may mga project si FPJ na bagay sa aktor at marahil, isa na nga Ang Probinsyano.

 

TAGAHANGA NI FPJ

“Bata pa lang po ako (tagahanga) ang lola ko kasi talagang solid FPJ fan. Noong bata ako, ‘yung nakalakihan ko talaga ang manood ng Filipino classic movies, isa po roon ang mga pelikula ni FPJ.”

Walang babaguhin sa bersiyon ng pelikulang Ang Probinsyano na isasalin sa teleserye na isusulat ng headwriter na si Joel Mercado at ang mga magdidirehe ay sina Ms. Malu Sevilla at Avel Sunpongco.

 

Makakasama ni Coco sina Arjo Atayde na gaganap bilang bestfriend niyang pulis din na may lihim na gawain, Angeline Quinto at Bela Padilla bilang leading ladies, at gaganap na lola ng probinsiyano ay walang iba kundi si Ms. Susan na apo talaga ang turing sa aktor.

Kasama rin si Albert Martinez bilang tatay ni Arjo at labis na nagpapasalamat kay Coco dahil parati raw siyang inire-request sa mga project nito. Ka join din si Jaime Fabregas.

May isa pa raw leading lady si Coco na hanggang ngayon ay wala pang final decision kung sino pero dapat daw ay sexy ito, kaya’t pumasok ang pangalan ni Yam Concepcion.

 

HINDI MAPAPANTAYAN SI FPJ

Say ni Coco sa bago niyang papel bilang sundalo pagkatapos ng SAF 44, “Matindi, matinding nerbiyos. Sabi ko nga po napakasuwerte ko na kahit paano magagampanan ko ang isa sa pelikulang talagang tumatak sa ating mga Filipino.

“Siyempre po malaki ang pressure sa akin na alam ko na never kong mapapantayan pero kahit paano mabibigyan ko ng justice ‘yung character ko.

“Gusto ko sana tangkilikin ng manonood ‘yung gagawin naming soap opera, ngayon po ‘yung preparation po sa kaalaman po ng marami ang ginagawa ko more on drama and then nag-a-action din ako paminsan-minsan.

“And then sinabi ko talaga, sana magkaroon ako ng matinding training dahil iba si FPJ, iba ang ginagawa niya sa kanyang mga pelikula. Ayoko naman na mapahiya ako at kahit paano mapaghandaan ko.”

As of this writing ay hindi pa alam nina direk Malu kung saang kampo sila magte-taping ng Ang Probinsyano para sa ilang eksena nito.

“As in wala pa, kanina lang kami nag-meeting, wala pang kompletong detalye,” sabi ni direk Malu sa amin.

ni Reggee Bonoan