HATAW! D'yaryo ng Bayan hatawtabloid.com
KAILANGAN sigurong magpapayat ni JC Padilla kung talagang seryoso siya sa singing career niya ngayong isa siya sa inilunsad ng Star Music bilang OPM Fresh noong Martes dahil mukha siyang action star.
Nakasalubong namin si JC at hindi namin nakilala dahil sumobrang laki ng katawan at hindi rin niya kami kilala kaya tiningnan lang niya kami at hindi man lang ngumiti na kabaligtaran ng kuya Daniel Padilla niya na maski hindi niya kilala ang taong nasasalubong ay bumabati at yumuyuko na nakuha niya sa tiyuhing si Robin Padilla. (Parang hindi na rin Regs. O baka pagod lang that time noong makasalubong namin si Daniel. Although pinagbigyan naman niya ang lahat ng nagpa-picture sa kanya. Pero sana nga hindi pa rin nagbabago ang binata ni Karla.—ED)
Pagtatanggol naman ng mga dikit sa pamilya Padilla ay sobrang mahiyain daw si JC kaya hindi namamansin, okay fine!
At napansin na rin namin na sa Q and A ay mahiyain nga dahil halatang kinakabahan nang tanungin siya ng entertainment press kung ano ang pagkakaiba ng boses nila ni DJ na may album na rin.
“Siguro masabi ko lang na difference namin hindi ko naman inilalayo ‘yung boses ko and hindi ko rin naman ginagaya.
“Pero siguro magkaiba talaga ‘yung style namin, mas husky ang boses ko. Mas clean kay kuya. Mas pang-pop ang boses niya,” sabi ni JC.
Oo nga, pinakinggan namin ang awiting Kasalanan na kasama sa OPM Fresh na orihinal na kanta ng Orient Pearl at kaboses talaga ni Daniel si JC.
At sa tanong kung ano ang mga bilin sa kanya ng mama Karla Estrada niya at ni Daniel? “Bilin nila na i-enjoy ko lang ‘yung blessings na dumarating sa akin and stay humble,” sabi pa ng binata.
At sa tanong kung planong pasukin n JC ang pag-arte tulad ni Daniel, “singing lang forever,” mabilis niyang sagot.
Siguro dapat ding pag-aralan ni JC ang maging magiliw sa entertainment press para hindi siya mapagkakamalang suplado.
ni Reggee Bonoan
