Kuya Boy, iginiit na ayaw mapag-iwanan ang The Buzz kaya tinanggal na sa ere

NILINAW ni Boy Abunda ang tsikang kaya nag-babu na sa ere ang The Buzz ay dahil bumaba ang ratings at kailangang paghandaan ang bagong programa ni Willie Revillame sa GMA-7, bukod pa sa paghahanda na papasukin nito ang politika.

Paliwanag ni Kuya Boy kamakailan, “he (Willie) was never thought about and ayoko namang sabihin na nagagamit siya or nagagamit kami. Wala talaga. He (Willie) has nothing to do with it. It is an internal decision.

“Bakit tinanggal? Kasi, sa totoong pananalita, ayaw naming mapag-iwanan. We have to come back strong; we have to come back with a new face, a new spirit, and a new color.

“Pero sabi ko nga, tanggapin natin. Kung kailangan si Kris (Aquino), go. Kung hindi ako kailangan, I’m okay, I’ll find another show. Pero huwag na ipilit. Baka hindi na kami bagay. Kasi at a certain point, parati ko ngang sinasabi, we all have to go. Fortunately and unfortunately, ako, pinaghandaan ko ito.”

Tungkol naman sa pagpasok niya sa politika ay wala raw katotohanan dahil kasalukuyang nanunungkulan bilang Mayor ng Borongan, Samar ang kapatid niyang si Ms. Fe Abunda.

At ang tungkol naman sa ratings game ay hindi totoong bumaba o mababa ito.

“’Yung last show namin, ang load ng commercial is halos 30 minutes, we were like 28 or 29, close to 30 minutes of commercial,” pahayag ni Kuya Boy.

Sa kasalukuyan ay wala pang alam kung kailan ang ere ng bagong programa kaya’t habang wala pa ay gusto raw muna ni kuya Boy mangibang bansa.

“Actually, minsan walang plano, naisipan lang namin ni Bong (Quintana-parter niya) na ‘tara punta tayo ng Hongkong, Macau o Singapore’ pero wala kaming dalang gamit. Doon na lang kami bibili tapos babalik din kinabukasan, wala lang para lang maiba ang atmosphere,” masayang sabi ng King of Talk.

Samantala, naikuwento rin ni kuya Boy na kaya sobrang saya rin niya noong Linggo bago siya pumunta ng The Buzz ay dahil nagpakitang gilas daw ang mama niya na biglang tumayo at naglakad mag-isa sa loob ng maraming taon.

“Nakakalakad si nanay, pero may alalay, may kasama at hindi nakatayo ng diretso as in naka-ganito (muwestrang kuba), pero last Sunday (Abril 5), biglang tumayo as in straight at naglakad ng walang hawak, parang sinabi niya na, ‘magaling na ako, okay ako,’ kaya napaluha ako, sobrang sarap ng pakiramdam. Wala na akong mahihiling pa,” say nito.

Naitanong uli namin na dahil guaranteed contract si Kuya Boy kasama sina Kris Aquino at Toni Gonzaga ay kailangan may kapalit ang nawalang show.

Napangiting sagot ng King of Talk, “actually, guaranteed contract kami, yes, dapat may kapalit kasi malulugi ang management, ha, ha, ha.”

At dapat ba hindi bababa sa tatlong programa ang umeere, “well, I have ‘Bottomline’, I have ‘Aquino and Abunda Tonight’, I have ‘Inside Cinema’, pero cable naman ‘yun kaya hindi counted, siguro, so dapat isa pa.”

 

ni Reggee Bonoan