HATAW! D'yaryo ng Bayan hatawtabloid.com
ni Pilar Mateo
WAITING in the wings! When it comes to love, iba pala ang paniwala ng Kapamilya Teenstar na si Jane Oineza.
Na gaano man katagal ang hintayin, ang takdang panahon ay aangkop pa rin sa maraming bagay sa ikot ng kanyang mundo.
At ganito ang katauhang gustong ipamalas ng kanyang ginagampanan sa Nasaan Ka Nang Kailangan Kita bilang si Corinne.
“Sa papel ko bilang si Corinne, naniniwala siya na ‘true love waits.’ Para sa kanya kasi, lahat ng bagay ay dapat nangyayari sa tamang paraan. Kung totoo talaga ‘yung pag-ibig ng dalawang tao para sa isa’t isa, hindi ‘yun magbabago kahit na lumipas pa ang mahabang panahon,” pahayag ni Jane sa trending drama series sa hapon na kanyang pinagbibidahan kasama sina Vina Morales, Denise Laurel, Loisa Andalio, Joshua Garcia, at Jerome Ponce.
Mas kapana-panabik na naman ang mga tagpo sa nasabing teleserye ngayong magsisimula nang manligaw si Joel (Joshua) kay Corinne, na unti-unti namang napapalapit kay Ryan (Jerome). Paano maaapektuhan ng panliligaw ni Joel ang relasyon ng magkapatid na sina Corinne at Bea (Loisa)? Anong pagbabago ang haharapin nina Cecilia (Vina), Corinne, Bea, at Toni (Denise) ngayong gagawin na ni Leandro (Christian Vasquez) ang lahat para mapawalang bisa ang kasal nila ng unang asawa?
Kaya bilang pasasalamat sa mga tagasubaybay ng Nasaan Ka Nang Kailangan Kita, sa pagsama nila sa mga luha, ngiti, kilig at nginig ng NKNKK, isang espesyal na fans day ang handog nina Jane, Jerome, Joshua, Eslove Briones, at Emmanuelle Vera sa kanilang mga taga-suporta sa Marso 28 (Sabado), 5:00p.m., sa SM City Lucena.
Huwag palampasin ang mas umiinit na tagpo sa teleserye na sumasalamin sa iba’t ibang mukha ng pag-ibig, araw-araw, tuwing 3:15 p.m. pagkatapos ng Flordeliza sa Kapamilya Gold ng ABS-CBN. Para sa kagradagang impormasyon kaugnay ng Nasaan Ka Nang Kailangan Kita mag-log on lamang sa www.abs-cbn.com, o sundan ang @abscbndotcom sa Twitter.
Maaari na ring panoorin ang full episodes o past episodes ng Nasaan Ka Nang Kailangan Kita gamit ang ABS-CBNmobile. Pumunta lamang sa www.abscbnmobile.com para sa karagdagang impormasyon.
Teka, alam ba ni Jane na ang dami ng mga matang naka-abang na sa kanya na mas malalim pa sa pakikipag-kaibigan ang puntirya?
