Riding in tandem sinita, sekyu utas

NAPATAY ang isang security guard makaraan barilin ng isa sa dalawang hindi kilalang lalaking lulan ng motorsiklo na kanyang sinita nang hindi huminto sa main entrance ng subdibisyon sa Muntinlupa City kahapon ng madaling araw.

Kinilala ng pulisya ang biktimang si Antonio Diaz, 39, ng JNB Security Agency, at nakatira sa Lakeview Homes, Putatan, Muntinlupa.

Isinugod ang biktima sa Medical Center Muntinlupa sanhi ng isang tama ng bala sa kanyang katawan at pilit na isinalba ng mga doktor ngunit binawian ng buhay makalipas ang mahigit isang oras.

Naganap ang insidente dakong 1:32 a.m. sa main entrance gate ng Agro Homes Subd., Putatan habang naka-duty ang biktima.

Sa imbestigasyon, kasamang nagbabantay ni Diaz ang ka-buddy na lady guard na si Mardy Chavez, sa naturang lugar nang pumasok sa subdibisyon ang motorsiklong lulan ang dalawang lalaki na ‘di man lamang huminto sa entrance gate.

Sinita sila ni Diaz ngunit biglang bumunot ng baril ang nakaangkas na suspek saka binaril ang guwardiya saka mabilis na tumakas. (MANNY ALCALA)