BBL ‘di ibabasura ng Senado

TINIYAK ni  Senate President Franklin Drilon, hindi ibabasura ng Senado ang Bangsangmoro Basic Law (BBL) kundi ito ay tatalakayin at iaayon lamang sa nilalaman ng Saligang Batas ang magiging probisyon o nilalaman nito.

Ayon kay Drilon, hindi lamang nila mahahabol ang unang target  na matapos ang pagtalakay rito at maipasa ngayong Marso 18, ang huling araw ng sesyon bago ang adjournment.

Aminado si Drilon, lubhang nakaapekto ang Mamasapano, Maguindanao incident kaya’t naudlot ang pagtalakay rito ng Senate Committee on Local Government na pinamumunuan ni Senador Ferdinand “Bongbong” Marcos.

Magugunitang ilang pagdinig na ang idinaos ng komite ni Marcos upang talakayin ang BBL ngunit nahinto nang maganap ang insidente na ikinamatay ng 44 miyembro ng Philippine National Police Special Action Force (PNP-SAF).

Tinukoy ni Drilon, tulad ng pagtitiyak ng mababang kapulungan, sa Hunyo na rin nila matatalakay ang BBL sa pagbabalik ng sesyon.

Binigyang-linaw ni Drilon, hindi maaaring sundin na lamang ng Senado ang inihain o isinubo sa kanilang kopya o sipi ng BBL.

Iginiit niyang bilang mga senador at mamabatas sila ay kinatawan ng taong bayan at hindi ng sino mang ahensiya ng pamahalaan o grupo o organisasyon. 

Niño Aclan/Cynthia Martin