1 patay, 3 sugatan sa jailbreak sa Sarangani

PATAY ang isang preso habang sugatan ang tatlong iba pa sa jailbreak sa Malapatan District Jail sa Sarangani nitong Miyerkoles.

Dakong 7:30 p.m. nang agawin ng dalawang trustee prisoner na kinilalang sina Ronald Uppos at Roberto Caratayco ang baril at susi mula kay Jail Officer 1 Sofreme Autor.

Dalawang putok ng baril ang narinig ng mga pulis na naka-estasyon malapit sa kulungan, at nang sila ay magresponde, naabutang nagpapambuno ang jail officer at dalawang preso.

Hanggang magkaputukan at napatay dahil sa tama sa dibdib ang presong si Mod Lakim. Habang kinilala ang tatlong sugatan na sina Jerry Villota, may kasong theft; Jerald Caballes, may kasong carnapping; at Mitchel Macaso, may kasong paglabag sa RA 9165.

Tuluyang nakapuga sina Uppos na may kasong theft, at Caratayco, may kasong attempted rape. Kasama ring nakatakas sina Gerald Lipasana, may kasong carnapping, at Romnick Poster, murder. 

Tumangging magbigay ng pahayag ang warden ng piitan na si Senior Jail Officer 4 Allan Garmino kaugnay sa insidente. Nagpapatuloy ang joint pursuit operation ng Malapatan Police at Bureau of Jail Management and Penology (BJMP).