Gov’t sinisi sa perhuwisyong MRT vs mananakay (Bistado na kayo)

DAPAT umamin at tigilan ang pagtuturo sa kakarag-karag na MRT at paulit-ulit na pagtirik nito.

Ito ang pahayag ni Kabataan Partylist Rep. Terry Ridon kahapon sa mga pinuno ng Department of Transportation and Communication (DOTC) at ng MRT sa pagpapatuloy ng imbestigasyon ng Mababang Kapulungan ng Kongreso hinggil sa problemang bumabalahaw sa mga takaw-aksidenteng tren ng MRT.

“Pagpapabaya ng gobyerno ang dahilan kung bakit nagkakadisgrasya sa MRT,” ayon kay Ridon.

Isinisi ni Ridon sa tinagurian nitong “kultura ng pagtuturo” ng Administrasyon sa kabiguan ng gobyernong solusyonan ang mga isyung bumabagabag sa MRT na nagbunsod sa panukalang limitahan ang operasyon nito tuwing Sabado at Linggo.

Kinompirma ni MRT General Manager Ramon Buenafe na ang pansamantalang pagtigil ng operasyon sa mga araw na ito ay inaprubahan na ng DOTC. Ang nasabing panukala ay nangangahulugang ititigil nang maaga ang pagtakbo ng mga tren ng MRT tuwing Sabado at itutuloy na lamang pagkatanghali ng Linggo o alas dose ng sumunod na araw.

“Noon pa dapat bumili ng mga bagong riles at mga bagong bagon ang gobyerno. Bulok na ang buong MRT, mula sa tren hanggang sa riles. Noon pa dapat pinalitan o imantine ang matagal nang dapat isinailalim sa rehabilitasyon ng gobyerno mismo.”

Binigyan ng limang taon ang administrasyong Aquino upang isaayos ang MRT ayon sa mambabatas mula sa oposisyon, “Dahil sa kabiguan ng gobyernong ayusin noon pa ang serbisyo ng MRT, tanging gobyerno ang may sala sa kalbaryo ng kalahating milyong mananakay ng MRT araw-araw.”