3 MMDA personnel sinibak sa katiwalian (23 suspendido)

TATLO pang tauhan ng Metropolitan Manila Development Authority (MMDA) ang sinibak habang 23 ang suspendido kaugnay sa pagkakasangkot sa iba’t ibang katiwalian.

Sinabi ni MMDA Chairman Francis Tolentino, napatunayan sa kasong extortion o pangingikil, grave misconduct, at gross neglect of duty, kaya tinanggal ang tatlo niyang tauhan.

Ngunit sa hindi malamang dahilan, hindi isinapubliko ang pangalan ng tatlong sinibak na pawang mula sa Traffic Discipline Office (TDO) ng ahensiya.

Habang ang 23 tauhan ay suspendido ng 15 hanggang 90 araw dahil sa ilang katiwalian  na kinasangkutan tulad ng extortion activities, questionable issuance of traffic violation receipts, misconduct, grave abuse of authority, insubordination, violation of office rules, at bigong pagdalo  sa buwanang  formation.

May 50 pang inisyuhan ng  warnings at reprimands dahil sa ilang paglabag at may ilan ding sinampahan ng pormal na kaso.

Nilinaw ni Tolentino, ang mga nasangkot nilang tauhan sa mga katiwalian ay pawang dumaan sa due process at masusing imbestigasyon ng Administrative and Legal Departments ng MMDA.

Jaja Garcia