Kyla, aminadong na-starstruck sa mga taga-ASAP (Gustong maka-duet si Sarah Geronimo)

ISA si Kyla sa nominado sa MYX Music Awards 2015 na gaganapin sa March 25, 2015 sa SM Aura Premier’s Samsung Hall.

Nominado siya sa apat na kategorya. Una ay sa Favorite Female Artist at kabilang sa co-nominees ni Kyla rito sina Julie Anne San Jose, Sarah Geronimo, Toni Gonzaga, at Yeng Constantino. Ang isa pa ay sa Favorite Music Video para sa kanta niyang Dito Na Lang. Kasama rito ni Kyla sina Abra at Julie Anne San Jose (Dedma), Yeng Constantino (Ikaw), Gloc 9 featuring Regine Velasquez (Takipsilim) at Sarah Geronimo (Tayo).

Kabilang pa rito ang Favorite Mellow Video para sa kantang Dito Na Lang na co-nominees niya rito sina James Reid at Nadine Lustre (Bahala Na), Yeng Constantino (Ikaw), Julie Anne San Jose (Right Where You Belong), at Daniel Padilla (Simpleng Tulad Mo).

Para naman sa Favorite Song, pasok ulit ang kanta ni Kyla na Dito na Lang. Ang iba pang nominees ay sina KZ Tandingan (Mahal Ko O Mahal Ako), James Reid at Nadine Lustre (No Erase), Daniel Padilla (Simpleng Tulad Mo), at Toni Gonzaga (This Love Is Like).

Nabanggit ni Kyla na masaya siya sa pagiging parte ng 20th anniversary celebration ng ASAP na ginanap kahapon, February 22. Pero hindi siya makapagbigay ng diretsong sagot kung magiging regular na siya sa ASAP.

“Tignan po natin, siguro po,” nakangiting saad niya. “Makikita po natin iyan in the next few weeks,” nakatawang dagdag pa niya.

Nasabi rin ni Kyla na excited siyang makatrabaho ang kanyang mga idolo.”Sobra-sobrang excitement at sobra-sobrang kaba rin,” nakangiting pahayag niya.

“Siyempre I’m always excited although nakakatrabaho ko naman na sila all the time. Pero hindi maaalis sa akin kasi, I really look up to them. Hindi maalis yung kilig ko, yung excitement ko na makakasama ko ulit sila in a show, in a TV show,” pahabol pa ng R&B Princess.

Sino ang gusto mong maka-duet sa ASAP? “Honestly, siguro ay si Sarah (Geronimo). Kasi, I see her ano… mga performances and she also does yung mga R&B sometimes. ‘Tapos feeling ko ay mahahawa ako sa kanyang passion. Kasi like, when she performs, talagang may mga dance-dance.”

Sinabi rin ni Kyla na na-starstruck siya sa mga taga-ASAP. “Opo, hindi po maaalis ‘yun, kasi talaga namang even before I started in showbusiness, I really look-up to Gary V. and Martin Nievera.

“Although I have performed with them so many times already, pero hindi maaalis yun e,’ di ba? Iyong admiration for them, andoon lang siya parati.”
ni Nonie V. Nicasio