Apo ni Abalos, kaibigan pinatay ng dyowa

NATAGPUANG patay ang dalawang babae sa loob ng kanilang inuupahang bahay sa Angeles City, Pampanga.

Kapwa ginilitan ang mga biktimang sina Ely Rose Abalos at Princess Ellaine Costales, parehong estudyante.

Kinompirma ni Angeles City Mayor Edgardo Pamintuan na si Ely Rose ay apo ni dating Commission on Elections (Comelec) Chairman Benjamin Abalos.

Dating kasintahan ni Ely Rose ang suspek na si Blessed John Albano. 

Ayon kay Pamintuan, nabatid na bumisita sa bahay ng mga biktima ang suspek na ilang beses namataang bumibili ng alak bago ang krimen. 

“Ang nakita nilang motibo talaga is crime of passion… Noong mga alas-2:00 o alas-2:30 ng madaling araw (Biyernes), may tumawag na apparently, allegedly boyfriend nitong babae (Abalos)… Sa imbestigasyon nila parang nagalit yata si lalaki (Albano).”

Sa ikalawang palapag ng bahay nagpang-abot ang suspek at si Abalos na nakatakbo pa pababa sa unang palapag. 

Sinubukang tulungan ni Costales ang kaibigan ngunit nadamay siya sa galit ng suspek. 

Agad natunton si Albano na umamin sa krimen at ngayon ay nakapiit na sa Angeles City Police Station.

Nahaharap ang suspek sa two counts ng murder.