All-out war ni Erap ‘di kinagat (Palasyo natuwa)

IKINATUWA ng Palasyo na hindi kinagat ng publiko ang panawagan ni ousted president, convicted plunderer at Manila mayor Joseph “Erap” Estrada na magdeklara ng all-out war laban sa Moro Islamic Liberation Front (MILF) kasunod ng pagkamatay ng Fallen 44 sa sagupaan sa Mamasapano.

Sinabi ni Presidential Spokesman Edwin Lacierda, ikinagalak ng administrasyong Aquino na kahit mataas ang emosyon ng mga Filipino bunsod ng Fallen 44 at walang umapela na magdeklara ng all-out war laban sa MILF dahil hindi kakayanin nang lahat ang magiging danyos nito.

“And I certainly appreciate the fact that Filipinos are… While they are very emotional right now, at this given state, they have not resorted to calling for an all-out war because the cost is just too much for us to bear,” tugon ni Lacierda hinggil sa all-out war call ni Erap laban sa MILF.

Giit ni Lacierda, kinikilala ng pamahalaan ang galit ng taong bayan sa pagkamatay ng 44 kasapi ng Special Action Force (SAF) nang makipagbakbakan sa MILF at Bangsamoro Islamic Freedom FighteR (BIFF) sa Mamasapano, Maguindanao noong Enero 25, ngunit dapat ilagay ito sa tamang perspektiba.

“We do recognize the heightened emotional aspect, the heightened emotional state, but we need to bring everything into its proper perspective,” ani Lacierda.

Matatandaan, isang araw makaraan ang madugong Mamasapano incident ay inihayag ni Erap na tanging ang all-out war lang laban sa MILF ang makalulutas ng secessionist problem sa Mindanao.

Rose Novenario