‘Resignation Cake’ Regalo Kay Pnoy

‘RESIGNATION cake’ ang regalo ng mga grupo ng militante sa ika-55 kaarawan ni Pangulong Benigno Aquino III.

May nakalagay na “Noynoy Resign Now!” binitbit ng  Anakbayan at League of Filipino Students (LFS) ang mock cake sa protesta sa Mendiola kahapon

Hiling nilang magbitiw na si Aquino dahil sa operasyon sa Mamasapano na ikinamatay ng 44 pulis.

Giit ni Anakbayan National Chairperson Vencer Crisostomo, “At 55, Aquino is old enough to know that he is responsible for the Mamasapano encounter. He was there on the command center when the encounter happened, yet he continues to dodge accountability for the event.”

Lakas, patnubay at grasya birthday wish ni Pnoy

IBAYONG lakas, patnubay at grasya.

Ito ang panalangin ni Pangulong Benigno Aquino III sa kanyang ika-55 taon kaarawan kahapon.

“Siyempre ang nais ng Pangulo sa kanyang pananalangin ay magkaroon siya ng ibayong lakas at patnubay at grasya na magampanan ang kanyang mga tungkulin dahil po sa mahalagang ginagawa niyang paglilingkod sa ating mga mamamayan,” sabi ni Communications Secretary Herminio Coloma Jr.

Hiniling din ni Coloma sa publiko na ipagdasal si Aquino upang matupad ang mga ipinangako niyang maramdaman ng lahat ang pag-unlad ng ekonomiya ng bansa.

“Taimtim na panalangin at gabay ng Panginoon ang ating hangad para sa Pangulo sa kanyang patuloy na pagpapatupad at pagtataguyod ng mga proyekto at programa para matamo ang adhikaing inclusive growth sa loob ng kanyang panunungkulan,” aniya.

Tulad ng inaasahan, pribadong ipinagidiwang ng Pangulo ang kanyang kaarawan sa piling ng kanyang pamilya at makaraan ulanin ng batikos dahil sa madugong Mamasapano operation na nagresulta sa pagkamatay ng 44 miyembro ng Specia Action Force (SAF).

Rose Novenario