Buy & sale agent ng ginto itinumba

CAMP OLIVAS, Pampanga –Hinayaan munang matapos mag-almusal ang isang lalaking namimimili ng ginto bago pinasok ng isa sa riding in tandem sa loob ng canteen at binaril sa batok ang biktima kamakalawa ng umaga sa Sitio Santiago, San Vicente, bayan ng Apalit.

Base sa ulat ni Supt. Samuel Sevilla, hepe ng Apalit Police, sa tanggapan ni Chief Supt. Ronald Santos, PRO3 director, wala nang buhay nang madatnan ng mga pulis ang biktimang si Ariel Manabat y Punzalan, 47, ng San Roque, Macabebe, Pampanga.

Sa pagsisisyasat ni PO1 Artem Salita Tamsi, nabatid sa ilang saksi, maaaring may atraso ang biktima sa pamimili ng ginto dahil nakasakay pa lamang siya sa jeep galing ng Macabebe ay may sumusunod na sa kanyang dalawang lalaking lulan ng motorsiklo.

Pagdating sa Sitio Santiago ay bumaba ang biktima upang mag-almusal ngunit hinintay ng mga suspek at nang matapos kumain ay biglang pumasok ang mga salarin sa canteen at pinaputukan siya sa batok.

Nang masigurong patay na ang biktima ay mabilis na tumakas ang mga suspek lulan ng motorsiklo.

Leony Arevalo