HATAW! D'yaryo ng Bayan hatawtabloid.com
TUWING sasapit ang Pebrero 14 ay nagdiriwang ang mga taong nagmamahalan dahil ito’y Valentine’s Day o Araw Ng Mga Puso.
Tutok lang sa lifestyle program ng GMA NEWS TV na Gandang Ricky Reyes Todo Na Toh (GRR TNT) ngayong Sabado, 9:00-10:00 a.m. dahil pang-Love Day ang mga itatampok.
Dadalhin tayo ni Mader Ricky Reyes sa mga popular na kainang maaaring pagdalhan sa ating pamilya, asawa o kasintahan. Maaaring mag-order in advance ng mga putaheng inyong trip pagsaluhan sa halagang abot-kaya ng bulsa. May mga espesyal na setting for two na tunay na romantiko o tila pistang hain para sa pinagsamang pamilya, kamag-anak at kaibigan.
Magbibigay naman ng payo ang ating host-producer kung anong regalo ang dapat ibigay sa inyong Valentino o Valentina; pati na mga tindahan at lugar kung saan matatagpuan ang mga ito. “Sa totoo lang, ‘di naman kailangang magpalitan ng mamahaling regalo sa okasyong ito. Ang mas mahalaga’y maligaya, tahimik at trouble-free ang samahan,” sabi ni Mader.
Isang masuwerteng couple ang reregaluhan ng GRR TNT ng isang Make Over Magic para sa kanilang dinner date. Tuwang-tuwa ang dalawa sa kanilang pagbabagong-anyo at ‘di matapos-tapos ang pasasalamat nila sa Gandang Ricky Reyes Salon hairdressers na nag-ayos sa kanila mula ulo hanggang paa.
Abangan at kiligin sa pagtatampok ng mga ‘di malilimutang “historia de un amor” ng ilang sikat na personalidad sa pagsasalaysay ni Mader RR.
Laging panoorin ang GRR TNT na handog sa inyo ng ScriptoVision Enterprise para sa isang oras ng mga pagtatanghal tungkol sa isyung pangkabuhayan, pangkagandahan, at pangkalusugan.
