HATAW! D'yaryo ng Bayan hatawtabloid.com
ni Roldan Castro
MAGBABALIK ang original Asianovela heartthrob na si Jerry Yan ng F4 bilang eligible bachelor na biglang magiging ama sa pinakabagong primetime serye ng ABS-CBN na Unforgettable Love.
Unang minahal ng mga Filipino bilang si Dao Ming Si sa phenomenal Taiwanese serye na Meteor Garden, gagampanan ni Jerry ang kanyang pinaka-challenging at pinakaromantikong papel sa espesyal na dramang ito na ginawa pa sa mainland China. Gaganap naman bilang kapareha niya ang sikat na Chinese actress na si Tong Li Ya.
Sundan ang kuwento ni Gio, isang mayamang businessman na sasagipin ang isang batang lalaki mula sa isang aksidente sa mismong event ng kanyang kampanya. Rito bubulaga ang katotohanang ang batang ito pala ay kanyang anak.
Matapos mapatunayan sa DNA test na anak niya nga ito, babaling ang atensiyon ni Gio sa ina ng batang si Nina at pilit pagtatantuhin kung paano ito naging ina ng susunod na tagapagmana ng Li Corporation. At saka niya lang maaalala na si Nina pala ang babaeng minsang nakaniig niya ilang taon na ang nakararaan. Wala siyang kamalay-malay na nagbunga pala ang kanilang isang gabing pinagsaluhan.
Nang mabigyang linaw na ang lahat, pipilitin ni Gio na makuha ang anak. Magsasampa ito ng kaso sa korte at mapagtatagumpayan ang kustodiya sa bata. Ngunit, hindi patatalo si Nina ng ganoon lang at isusugal lahat maibalik lang ang pinakamamahal na si Jon Jon. Magagawa kaya ng dalawa na magkasundo para sa bata? Sa pagbukas ni Gio ng puso sa batang ngayon niya lang nakilala, bubuksan niya rin kaya ang puso kay Nina?
Huwag palalampasin ang pagsisimula ng kuwentong hindi niyo malilimutan sa Unforgettable Love na nagsimula na noong Lunes (Feb 2) pagkatapos ng Aquino and Abunda Tonight sa Primetime Bida ng ABS-CBN.
