Jake at Bea, ‘di nag-uusap pero nagte-teksan

ni Roldan Castro

INAMIN ni Jake Vargas na nabawasan sila sa Master Showman dahil sa pagkakasakit niKuya Germs. Forty na lang daw sila ngayon sa show. The show must go on pa rin kahit ganoon ang nangyayari habang nagpapalakas si Kuya Germs.

“Siyempre, nakakaawa, eh ‘yung iba ang gusto lang naman exposure sa TV, gusto nilang sumikat kaya ako kapag nandoon sa ‘Walang Tulugan’, hinahayaan ko lang sila para magkaroon ng exposure kahit p apaano…eh, ako matagal na rin naman ako sa ‘Walang Tulugan’,” sambit niya nang makatsikahan siya sa presscon ng pelikula nila ni Bea Binene naLiwanag Sa Dilim under APT Entertainment.

Napansin din ng press na tila may kiss mark sa leeg si Jake samantalang napapabalitang split naman sila ni Bea.

“Hindi kiss mark ‘yan, na-allergy ako. Bawal kasi sa akin ng malalansa,” paglilinaw niya na nakita naman namin ang marka paakyat hanggang tenga pero pagaling na.

Paano na ang tattoo ni Jake na nakalagay ang pangalan ni Bea kung split na sila? Ang laki pa naman niyon? Paano mabubura? Pero sabi nga nila, inaayos nila ang pinagdaraanan nila.

“Maaayos din naman po. Bandang huli ay maaayos din ‘yan,” deklara ni Jake.

Ano ba ang madalas nilang pag-awayan ni Bea?

“Mababaw lang naman..kasi kami parehong mataas ang pride kaya kaunting ganoon lang, parang ang laki-laki na sa amin,” aniya.

Sino ang gumagawa ng first move para magkabati sila?

“Siyempre, lalaki naman lagi ang nauuna,” aniya.

Matagal ding nakasagot si Jake kung ‘yung sinasabi nila ni Bea na ‘okey kami’ ay nag-uusap sila, may communication sila.

“Nakaka-text ko siya,” simpleng sagot niya na magta-tatlong taon na rin ang relasyon nila.

Pak!