Napeñas hiniling ibalik

MADAMDAMIN na ipinanawagan ni Special Action Force (SAF) officer-in-charge Chief Supt. Noli Talino kay Pangulong Benigno Aquino III na ibalik ang sinibak nilang pinuno na si Director Getulio Napenas.

“Sabi ni General Napeñas, SAF is an organization where good men gather and are always ready to serve. God, country, people, and organization. General Napeñas is a good man, he’s a good leader. We thank him for giving SAF the much-needed leadership. Sana maayos lahat, at makabalik siya,” ani Talino sa kanyang eulogy sa necrological service para sa SAF 44 sa Camp Bagong Diwa, Taguig City kahapon.

Si Napeñas ay sinibak makaraan ang madugong enkwentro ng SAF sa pinagsanib na pwersa ng Bangsamoro Islamic  Freedom Fighters (BIFF) at Moro Islamic Liberation Front (MILF) sa Mamasapano, Maguindanao noong Linggo na ikinamatay ng SAF 44 at ikinasugat ng 14 iba pa.

Sa kanyang President’s Message to the Nation noong Miyerkoles, sinisi ng Pangulo si Napeñas sa naganap na trahedya dahil aniya sa kakulangan ng koordinasyon sa ibang ahensiya ng pamahalaan at sa MILF.

Inamin ni Talino, naramdaman nila ni Napeñas na sila ay guilty sa sinapit ng kanilang mga tauhan ngunit ginawa nila aniya ang lahat ng kanilang magagawa.

Rose Novenario